தீராத விளையாட்டுப் பிள்ளை‍-திரை விமர்சனம்

இன்றைய இளைஞர்கள் விருப்பப்பட்டு தேர்ந்தெடுப்பது கல்வியா?செல்வமா?வீரமா? என்பதைச் சொல்ல 'முற்போக்கு சிந்தனையுடன்(?)' வந்திருக்கும் படம்தான் 'தீராத விளையாட்டுப் பிள்ளை‍'.

தான் தேர்ந்தெடுக்கும் எதுவுமே மிகச் சிறந்ததாக இருக்க வேண்டும் என்ற கொள்கையுடன் வாழ்ந்து கொண்டிருக்கும் விஷால்,கல்யாணம் என்று வரும்போது,மூன்று பெண்களைக் காதலித்து,அந்த மூவரில் மிகச் சிறந்த ஒரு பெண்ணைத் தேர்ந்தெடுக்க நினைக்கிறார்.இதற்காக அவர் தேர்ந்தெடுக்கும் மூன்று பெண்கள் காலேஜில் படித்துக் கொண்டிருக்கும் சரா ஜானே,கோடீஷ்வரியான நீத்து சந்திரா,விளையாட்டில் சிறந்த தனுஸ்ரீ தத்தா.இந்த மூன்று பெண்களில் விஷால் யாரைத் தேர்ந்தெடுக்கிறார் என்பதுதான் தீராத விளையாட்டுப் பிள்ளை‍யின் கதை.

ஆக் ஷன் அதிரடியைக் கைவிட்டு விட்டு இந்த மாதிரி படத்தில் 'நடிக்க' முயற்சித்ததற்காகவே விஷாலைப் பாராட்டலாம்.மூன்று பெண்களும் அறிமுகமாகும் போது 'யுவன் சங்கர் ராஜா' கொடுக்கும் 'Intro Music' நன்றாக இருக்கிறது.படத்தின் மிகப் பெரிய பலமே சந்தானம்,மயில்சாமி,சத்யன் இவர்களோடு விஷால் சேர்ந்து பண்ணும் காமெடிதான்.இதுக்கும் மேல காசு புரட்டனும்னா 'ட்ரெயினைத்தான்' போய் நிப்பாட்டனும் என்று சத்யன் சொல்வதெல்லாம் 'ரொம்பவே' ஓவர்.

பத்து வருடங்களுக்கு ஒரு முறை தமிழ்ப்படம் பார்ப்பவர்கள் கூட ஆரம்பத்திலேயே மிக எளிதாகச் சொல்லிவிடலாம்,விஷால் எந்தப் பெண்ணைத் தேர்ந்தெடுக்கப் போகிறார் என்று.தன்னைப் போலவே மற்ற இரு பெண்களையும் விஷால் காதலித்துக் கொண்டிருக்கிறார் என்று தெரிய வரும்போது,அந்த பெண்ணை விஷால் உடனே நிராகரிப்பதும்,அந்த பெண்தான் ஏதோ தப்பு செய்தது போல் பழியைத் தூக்கிப் போட முயற்சிப்பதும் உறுத்தலாக உள்ளது.'Annonymous' இடமிருந்து ஒரு பெண் 'பாம்' வைத்திருப்பதாக வரும் 'Call'கெல்லாம் 'போலீஸ்' இப்படித்தான் நடந்து கொள்வார்களா எனத் தெரியவில்லை.மூன்று ஹுரோயின்களில் தனுஸ்ரீ தத்தாதான் நடிப்பு,கவர்ச்சி என்று இரண்டுக்கும் வழி இல்லாமல் 'தேமே' வென்று இருக்கிறார்.

படத்தின் இரண்டாம் பாதியைக் கொஞ்சம் குறைத்திருந்தால் படம் இன்னும் சுவாரசியமாக இருந்திருக்கும்."உண்மையான காதல் எதையும் சந்தேகப்படாது,அப்படி சந்தேகப்பட்டால் அந்தக் காதல் நிலைக்காது" என்பதை சொல்ல வந்த படம்,அதைச் சொல்லிய முறையில் கொஞ்சம் சொதப்பினாலும்,'ஜாலியாக' இரண்டரை மணி நேரத்தை செலவழிக்க விரும்பினால்,இந்தப் படத்திற்கு போகலாம்.

தீராத விளையாட்டுப் பிள்ளை‍-நான் அவன் இல்லை